९ श्रवाण - काठमाडौं । नयां सरकार गठन प्रक्रियालाई लिएर संविधान सभाको सबैभन्दा ठूलो दल माओवादी र दोश्रो दल कांग्रेसवीच घम्साघम्सी शुरु भएको छ ।

माओवादीले विहिबार सिंहदरबारमा आयोजना गरेको २५ दलको बैठकमा कांग्रेसले तीन दलको गठबन्धनले सरकार बनाउने अडान राखेपछि माओवादी आक्रोशित भयो । कांग्रेसले तीन दलको लोकतान्त्रिक गठबन्धनको सहमतिको आधारमा नयां सरकार बन्ने र सरकारको नेतृत्व कसले गर्छ भन्नेबारेमा अहिले नै भन्न नसकिने जनाएको छ ।

कांग्रेसको अडानबाट क्षुब्ध बनेको माओवादीले पनि आफ्ना तीन शर्त पुरा नभए सरकारमा नजाने स्पष्ट पार्‍यो । तीन दलको गठबन्धन तोडिनु पर्ने, माओवादीको प्रतिबद्धतापत्रको आधारमा सरकारको साझा कार्यक्रम बन्नुपर्ने र अन्य दलहरुबाट कम्तिमा दुई बर्षसम्म सरकार नढाल्ने प्रतिबद्धता आउनुपर्ने कडा शर्त माओवादीले राखेको छ ।

यसो हुन नसकेमा तीन दलीय गठबन्धनलाई सरकार बनाउन दिएर आफू विपक्षमा बस्ने धम्की माओवादीले दिएको छ ।

बैठकमा साना दलले नयां सरकारको नेतृत्व माओवादीले नै गर्नुपर्ने भन्दै सरकार गठनको तयारी थाल्न आग्रह गरेका थिए । एमाले र फोरम भने तीन दलीय गठबन्धनलाई थाती राखेर माओवादीलाई सरकार गठनको बाटो खुल्ला गर्न नरम देखिएका छन् । सहमतिको खोजी गर्न २५ दलको अर्को बैठक चाडै नै बस्ने भएको छ ।

९ श्रावण - काठमाडौं । सरकार गठनको विषयमा दलहरुबीच छलफल चलिरहेका बेला एमाले नेता केपी शर्मा ओलीले एमालेलाई सरकारको नेतृत्व दिन अरु दललाई आग्रह गर्नुभएको छ ।

विहिबार आयोजित एक कार्यक्रममा ओलीले संक्रमणकालको ब्यवस्थापन र नयाँ संविधान निर्माणको जिम्मेवारी पुरा गर्न एमालेको नेतृत्वमा सर्वदलीय सरकार बन्नुपर्ने जिकिर गर्नु भयो ।

सबै दलको सहमतिमा एमाले महासचिव झलनाथ खनाललाई प्रधानमन्त्री बनाउनु पर्ने उहाँको भनाइ थियो ।

माओवादीलाई एकल सरकार बनाउन कुनै पनि हालतमा दिन नहुने तर्क गर्दै ओलीले माओवादी र एमालेको संयुक्त सरकार बन्ने सम्भावना पनि नरहेको दावी गर्नुभयो ।

माओवादीलाई आफ्नो बहुमत नभएको थाहा पाउन तीन महिना लागेको उल्लेख गर्दै ओलीले कांग्रेस, एमाले र मधेशी जनअधिकारबीचको गठबन्धनलाई अझ वढि बिस्तार गर्दै लगिनु पर्नेमा जोड दिनु भयो ।

९ श्रावण - काठमाडौं । पूर्व सभामुख सुवास नेम्वाङ संविधानसभा अध्यक्षमा निर्विरोध निर्वाचित हुनभएको छ । विहिबार वसेको संविधानसभा बैठकमा उहाँ नेम्वाङ निर्विरोध निर्वाचित भएको घोषणा गरियो ।

नेम्वाङलाई संविधानसभा अध्यक्ष बनाउन एमाले सभासद् विष्णु पौडेलले प्रस्ताव राख्नुभएको थियो । प्रस्तावलाई कांग्रेस सभासद् विमलेन्द्र निधिले समर्थन गर्नुभयो तर नेम्वाङले सपथ भने लिनुभएको छैन ।

अन्तरिम संविधानको पाँचौं संशोधबाट संविधानसभा अध्यक्षले राष्ट्रपतिसामू सपथ लिने उल्लेख छ । तर यो प्रावधान विपरीत बुधबारको संविधासभाको बैठकले संसदसमक्ष सपथ लिने कार्यविधि सर्वसमतिले पास गर्‍यो ।

आपसमा यो दुई प्रवधानबीच तालमेल नमिलेपछि विहिबार कार्यविधि संशोधनगरी राष्ट्रपतिसमक्ष सपथ लिने विधि तयार गरिएको छ । यही कानूनी अडचनले गर्दा संविधानसभा अध्यक्षले विहिबार सपथ नलिनुभएको हो ।

अध्यक्ष चयन पछि सञ्चारकर्मीहरुसित बोल्दै नेम्वाङले संविधानसभा निर्वाचनपछि पनि संविधान निर्माणमा ढिलाई भएको भन्दै अब यसलाई तीब्रता दिने प्रतिवद्धता जनाउनु भयो ।

९ श्रावण - काठमाडौं । माओबादी अध्यक्ष प्रचण्डले सरकार गठनका लागि २५ वटै दलसँग छलफल भइरहेको जानकारी दिनु भएको छ ।

राजधानीमा विहिबारदेखि सुरु भएको दोश्रो एसियाली जोरखाने खेलकुद प्रतियोगिताको उदघाटन पछि संचारकर्मीहरुलाई प्रतिक्रिया दिंदै प्रचण्डले सहमति बने माओवादीले सरकार बनाउने नत्र प्रतिपक्षमा बस्ने स्पष्ट गर्नुभयो ।

९ श्रावण - काठमाडौं । ट्राफिक व्यवस्थापनमा देखिएको चुनौतिलाई बेलैमा समाधान गर्न सवारी साधनको बढ्दो चाप न्यूनिकरण गर्नु आवश्यक भएको सरोकारवालाहरुले औंल्याएका छन् ।

नगर विकास कोषले विहिबार राजधानीमा गरेको कार्यक्रममा बोल्दै उनीहरुले विकास निर्माणको पूर्वाधार बनेको सडकको उपयोगितालाई व्यवस्थित गरी सार्वजनिक सवारीको स्पष्ट योजना लागू गर्नु पर्ने बताए ।

सडक विभाग, निर्माण व्यवसायी संघ सम्बद्ध व्यक्तिहरुले सडक निर्माणको प्राथमिकतासँगै बसपार्कको आवश्यकतालाई पनि समानुपातिक रुपबाट अगाडि बढाउनु पर्ने सुझाव दिए ।

९ श्रावण - काठमाडौं । ट्रक ढुवानीमा सिण्डिकेट प्रणालीको विरोध गर्दै १२ दिनदेखि बन्द रहेको कैलाली विहिबार दिउँसो दुई बजेदेखि खुलेको छ ।

कैलाली उद्योग वाणिज्य संघ र सेति महाकाली ट्रक व्यवसायी संघबीच सबैखाले सिण्डिकेट हटाउने लगायतका पाँच बुँदामा सहमति भएपछि उद्योग वाणिज्य संघले बन्द कार्यक्रम फिर्ता लिएको हो ।

सिण्डिकेट प्रणालीको पहिचान गर्नका लागि राजनीतिक दल, नागरिक समाज, कैलाली उद्योग वाणिज्य संघ र ट्रक समितिका प्रतिनिधि सम्मिलित कार्यदल गठन गरिएको छ । कार्यदललाई २० दिनको समयावधि दिइएको छ ।

सहमति अनुसार सेती महाकाली ट्रक व्यवसायमा आवद्ध नभएका व्यवसायीका ट्रकले पालो पर्खनु पर्ने छैन तर टि्रप शुल्क भने तिर्नुपर्ने छ । उक्त टि्रप शुल्क ट्रक संघले आफ्नो कोषमा राख्न नपाई कार्यदलले निर्णय गरेबमोजिमको क्षेत्रमा लगानी गरिने सहमति पनि भएको छ ।

९ श्रावण - काठमाडौं । राष्ट्रिय प्रजातन्त्र पार्टीका अध्यक्ष पशुपति शमशेर राणाले प्रमुख तीन दल नयाँ नेपाल निर्माणको कर्तव्यबाट विमुख भएको आरोप लगाउदै देशको अस्तित्व नै संकटमा पर्ने खतरा बढेको बताउनु भएको छ ।

राष्ट्रिय प्रजातान्त्रिक विद्यार्थी संगठनको तेश्रो राष्ट्रिय भेलामा वोल्दै राणाले तीन दललाई गणितिय खेलबाट मुक्त भई सहमतिको बाटोमा जान आग्रह गर्नु भयो ।

कार्यक्रमका सहभागी विद्यार्थी नेताहरुले अहिलेको शिक्षाले बेरोजगार मात्रै उत्पादन गरेको भन्दै शिक्षामा आमूल परिवर्तन हुनु पर्नेमा जोड दिए ।

९ श्रावण - काठमाडौं । शिखर वामन्थी नेता स्वर्गीय पुष्पलालकी धर्मपत्नी सहाना प्रधानले विहिबार राजधानीमा पुष्पलाल मेमोरियल कलेजको उदघाटन गर्नुभयो ।

प्रमुख राजनीतिक पार्टीका प्रतिनिधिहरुको उपस्थितिमा आयोजित उदघाटन समारोहमा पुष्पलाल स्मृति प्रतिष्ठानका महासचिव लोककृष्ण भट्टराईले नेपाली राजनीतिमा पुष्पलालको योगदानबारे चर्चा गर्नु भएको थियो ।

सो अवसरमा कलेजका पि्रन्सिपल पूर्णप्रसाद मिश्रले यस वर्ष कलेजमा व्यवस्थापन, मानविकी र शिक्षा संकायमा प्लस टु को पढाइ हुने र आगामी वर्ष देखि बीए बीबीएस र बी एडका कक्षाहरु संचालन गरिने जानकारी दिनुभयो ।

९ श्रावण - काठमाडौं । बंगलादेशको ढाकामा हालै सम्पन्न सम्मेलनले जाइका एल्मुनाई एशोसियसन फोरम अफ सार्क कन्ट्री जेएएएफएससिको स्थापना गरेको छ ।

सम्मेलनले जाइका एल्मुनाई एशोसियसन अफ नेपालका अध्यक्ष चण्डी प्रसाद श्रेष्ठलाई अध्यक्ष र जाइका एल्मुनाई एशोसियसन अफ बंगलादेशका महासचिव मोहम्मद इजार उदिनलाई महासचिवमा चयन गरेको छ ।

सम्मेलनमा सहभागी जेएएएनका उपाध्यक्ष ईन्जिनियर दिल्लीरत्न शाक्यले दिनुभएको जानकारीअनुसार जेएएएफएससिको कार्यालय हाललाई ढाकामा नै रहने छ ।

जेएएएफएससिले दक्षिण एसियाली राष्ट्रहरुको विकासमा जाईकामार्फत जापानले गर्दै आएको गतिविधिलाई सहयोग गर्ने, जाईका एल्मुनाई एसोसिएसनमार्फत क्षेत्रीय विकासलाई टेवा पुर्‍याउने लक्ष्य लिएको छ ।

९ श्रावण - काठमाडौं । महोत्तरीको जलेश्वर नगरपालिकाको वडा नम्बर १२ मलिवारा टोलमा रातो नदीको बाढी पसेपछि पचास परिवार विस्थापित भएका छन् ।

बाढीले रेलको पट्री बगाउँदा देशको एक मात्र जनकपुर जयनगर रेलसेवा पनि भएको छ ।

उता, त्रियुगा नदीमा आएको बाढी उदयपुरको तपेश्वरी गाविसका वडा नंवर १, २ र ३ मा पसेपछि करिब पाँचसय घर डुबानमा परेका छन् । बाढीले दुई सय विगाहामा लगाइएको धानबाली पूर्ण रुपमा डुबेको बताइएको छ । उदयपुरकै बेल्टार गाविसमा पर्ने लामाखोला र लाटीखोलामा आएको बाढीले बेल्टार फत्तेपुर सडक आवागमन पूर्ण रुपमा बन्द भएको छ ।

सप्तरीको खाडो खोलाको बाढी राजविराज नगरभित्र पसेपछि राजविराजको मेनरोडमा एक देखि ३ फिटसम्म पानी जमेको छ भने थुप्रै घरपरिवार विस्थापित हुने अवस्थामा पुगेका छन् ।

यता, सुनसरीको ट्याङग्रा र सुनसरी खोला गाउँतिर पस्दा सुनसरीको बसन्तपुरका ५, ७ र ८ तथा नरसिंहको ७ नंवर वडा जलमग्न बनेका छन् । सुनसरी खोलाले नै नरसिंहा-६ मा २५ घर भत्काएको छ ।